O primeiro paso antes de efectuar un deseño web debe ser o coñecemento das características e elementos deste novo medio, así como as claves da comunicación a traveso da rede. En base a isto, a primeira sesión dedícase sempre á análise de webs de distinta natureza. Se o grupo ten na súa maioría unha escasa familiarización coa rede, o número de sesións dedicadas a esta análise aumenta, buscando un maior coñecemento da rede antes de dar o salto ó deseño.

A reflexión en torno ás páxinas realízase a traveso de visitas guiadas e céntrase en tres eixes: educativo, visual e elementos técnicos subxacentes... Non se trata aínda de que aprendan a materializar o que están vendo, senón de que teñan criterios claros do que é unha web e de como darlle sentido educativo. Podemos dicir que pretendemos que aprendan a facer páxinas antes de saber usar ningunha ferramenta de edición, as ferramentas virán despois, para canalizar a expresión do que xa coñecen.

Para ilo xogamos cunha selección de páxinas educativas de distinta natureza e con tres guías de análise de páxinas que se centran nos aspectos sinalados: guía de aspectos formativos, guía de estilo gráfico e guía de elementos técnicos.

Tras levar a cabo diferentes visitas guiadas de análise de páxinas e segundo o grupo vaia asimilando os conceptos, proporanse novos sitios web en torno ós cales o grupo realizará as súas propias reflexións a traveso de dúas dinámicas:

- Debate en torno ós elementos que as compoñen; acertos e fallos dende os tres puntos de vista traballados; aspectos que engadirían, cambiarían e/ou suprimirían.

- Broullón de ideas enumerando compoñentes e características da páxina dende as tres perspectivas.