Os obradoiros multimedia de Ciberlingua diríxense a un público moi específico: o profesorado. Calquera proxecto formativo que se leve a cabo debe responder ás necesidades e intereses dos seus destinatarios se se busca continuidade e xeralización das aprendizaxes realizadas. Neste sentido, tratamos de fuxir dos típicos cursos de deseño web descontextualizados e sen significatividade, centrados no manexo de ferramentas informáticas, que toman como eixo fundamental o software cos seus menús, iconas e xanelas.

Posto que nos diriximos a mestres, enfocamos a aprendizaxe na elaboración de materiais educativos. En concreto, instase a cada mestre a traballar sobre un proxecto propio, libremente decidido en funcións dos seus intereses, nivel e materia impartida... O propio proxecto de cada mestre é o eixo do que xorden as cuestións técnicas e de manexo de software. É dicir, as ferramentas informáticas están ó servicio dunha finalidade concreta, tal como acontece nos usos reais que poidan facer delas.